Mikanaog na sa iyang posisyon si ACT-CIS party-list Representative Edvic Yap.
Atol sa sesyon sa House of Representatives niadtong Miyerkules, Pebrero 4, si Deputy Majority Leader ug Leyte Rep. Anna Victoria Veloso-Tuazon mipahibalo nga nakadawat siya og sulat gikan kang Yap bahin sa iyang pag-resign sa posisyon.
Tungod niini, gihangyo niya ang secretary general nga tangtangon si Rep. Yap gikan sa listahan sa mga miyembro sa House of Representatives.
Si Yap, ang igsoon ni Benguet Rep. Eric Yap, usa sa mga magbabalaod nga ginganlan ni Ombudsman Jesus Crispin Remulla kinsa giingong nakadawat og kwarta gikan sa magtiayong kontraktor nga sila si Pacifico “Curlee” Discaya ug Cezarah “Sarah” Discaya.
Ingon man nga giingong gihangyo ni Remulla ang Anti-Money Laundering Council (AMLC) nga ibutyag ang giingong relasyon tali ni Yap ug sa mga Discaya.
