CEBU CITY – Taliwala sa padayong panagbangi sa control sa pagpangandam sa umaabot Sinulog 2025, mipahayag si Cebu City Acting Mayor Raymond Alvin Garcia nga ang kagamhanang dakbayan sa Sugbo ang magdumala sa pag-organisar sa giilang pinaka-ingrandeng kapistahan sa nasud ug dili ang Sinulog Foundation Inc. (SFI).
Matud pa sa Acting Mayor nga ang Cebu City Government maoy nagdumala sa kadaghanan sa mga preparasyon sa festival ilabi na ang galastuhan niini.
Ingon man nakigtagbo nga ang Acting Mayor kay SFI Executive Director Elmer “Jojo” Labella aron mahatagan og katin-awan ang maong pag-organisar.
Dugang sab sa opisyal nga ang pagsugod sa pagpangandam sayo rong buwana mahinungdanon sa umaabot nga budgeting season diin ang kagamhanang dakbayan sa Sugbo gikatakdang mosugyot sa ilang 2025 annual budget.
Gawas sa subsidy nga madawat sa SFI gikan sa kagamhanang dakbayan, ang foundation gimanduan usab sa pagpangayo og sponsorships gikan sa mga benefactors aron makatabang sa pagtigom og pundo alang sa maong kalihukan.
Si Garcia midugang nga ang pagpangandam alang sa sponsorship packages kinahanglang himoon sa labing sayo nga panahon.
Kahinumduman nga giplanohang ihibalik sa Cebu City Sports Center ang pagpahigayon sa Sinulog 2025 sukwahi sa mando ni Suspended Cebu City Mayor Michael Rama nga sa nakalabay nga duha ka tuig gipahigayon ang Sinulog sa South Road Properties (SRP).
