Giinsister sa Armed Forces of the Philippines (AFP) nga dili trabaho sa militar ang pagpanghilabot sa politikanhong mga butang.
Kini taliwala sa panawagan nga mangilabot ang militar sa pagkasikop ni kanhi Presidente Rodrigo Duterte.
Sa usa ka pahayag, ang AFP nagmintinar nga sila nagpabiling pasalig sa ilang katungdanan sa pagpanalipod sa katawhang Pilipino, pagpanalipod sa Konstitusyon, ug pagpatunhay sa demokrasya.
Ang Armed Forces of the Philippines miinsistir usab nga ang bisan unsang kabalaka nga may kalabutan sa pagdumala kinahanglan nga sulbaron pinaagi sa legal ug demokratikong paagi.
Giluwatan sa militar ang maong pamahayag human gikuwestiyon ni Bise Presidente Sara Duterte ang pagpakahilom sa militar sa pagkasikop sa kanhi Presidente.
Gisaway usab sa pipila ka mga dumadapig sa kanhi Presidente ang militar nga giingong dili mapasalamaton bisan pa nga ang kanhi Presidente maoy nagdoble sa ilang suweldo atol sa iyang administrasyon.
Taliwala sa pagsaway ug pagkuwestiyon sa tahas ug responsibilidad sa AFP, gitumbok sa Armed Forces nga klarong gipahayag sa 1987 Constitution nga ang AFP usa ka non-partisan nga institusyon.
Samtang, naa sa Seksyon 5(3), Artikulo XVI, ang mga personahe sa militar gidid-an sa pag-apil sa politikanhong mga kalihokan ug bisan unsa nga paglapas niini nga prinsipyo makadaut sa demokrasya nga ilang gitahasan sa pagpanalipod.
Giingon usab sa AFP nga ang kalig-on sa demokrasya nagdepende sa pagrespeto sa mga institusyon, pagsunod sa angay nga proseso, pagsiguro nga ang hustisya mahatag pinaagi sa ligal nga mga agianan, ug ang pagpili sa mga opisyal pinaagi sa eleksyon.
Sa katapusan, gibarogan sa AFP ang mandato niini nga nakatutok sa pagserbisyo sa katawhang Pilipino uban ang dili matarug nga pasalig sa Konstitusyon.
