Nipagawas og kusganong pasidaan batok sa pagkaylap sa fake news ug tinuyo nga sayop nga impormasyon bahin sa mga operasyon sa West Philippine Sea (WPS) ang Armed Forces of the Philippines (AFP).
Sa usa ka pahayag, gisaway sa AFP ang mga pagsulay sa pagpahisalaag sa publiko pinaagi sa paggamit sa karaan o recycled footage isip bag-ong insidente sa Ayungin shoal.
Matud pa niini nga ang maong malinglahon nga mga taktika dili lamang iresponsable kondili gitumong usab sa pagmaniobra sa panglantaw sa publiko, pagtuis sa kamatuoran, ug pagpahuyang sa hiniusang baruganan sa paghingusog sa mga katungod ug hurisdiksyon sa atong nasud.
Bisan pa niini, kini nagkanayon nga ang Armed Forces of the Philippines nagpabiling lig-on sa pagdepensa sa atong soberanya ug hurisdiksyon base sa konstitusyon ug internasyonal nga balaod, partikular na ubos sa United Nation Convention on the Law of the Sea (UNCLOS) ug sa 2016 arbitral award.
Giawhag usab sa AFP ang publiko nga magpabiling kritikal, i-verify ang impormasyon ug i-refer lamang ang kasaligan ug opisyal nga tinubdan.
Gipasiugda sa AFP nga ang disinformation kay usa ka direktang hulga sa atong nasudnong integridad ug panaghiusa, ug nga ang kamatuoran mao ang atong pinakalig-on nga depensa.
Ang AFP nagpagawas sa pasidaan human sa pagpagawas sa usa ka video nga giingong nagpakita sa usa ka Chinese Coast Guard nga barko nga nagguyod sa usa ka barko sa Pilipinas, nga miresulta sa usa ka komprontasyon sa Ayungin shoal.
Bisan pa niini, wala’y gihatag nga petsa alang sa insidente, hinungdan nga kwestyonable ang lehitimo sa video.
