-- ADVERTISEMENT --

Gihimakak sa Armed Forces of the Philippines (AFP) ang mga pasangil sa pipila ka netizens nga daw wala mabati ang ilang presensya ning ting-ulan bisan pa man sa lapad nga pagbaha sa nagkadaiyang dapit sa nasud.

Matud pa ni AFP Spokesperson Col. Francel Margareth Padilla, ang ilang han-ay padayon nga nakig-alayon sa ilang mga katugbang ug nagkalain-laing ahensya sa gobyerno aron masiguro ang dali nga pagtubag sa mga katalagman.

Gani, ang AFP nakadeploy na og kapin 30 ka disaster response task units ug search and rescue teams, uban sa kapin 1,000 ka land assets, 48 ka air assets, ug 25 ka sea asset sa mga lugar nga apektado sa dili maayong panahon.

Dugang pa ni Padilla nga aduna usab kapin sa 1,100 ka teams o halos 13,000 ka personnel gikan sa nagkalain-laing dagkong serbisyo sa AFP nga mahimong makatubag bisan unsang orasa kon gikinahanglan.

Gihatagan niya og gibug-aton nga ang AFP dili lamang ang gitahasan sa pagtubag sa mga epekto sa Bagyong Crising ug sa habagat, gumikan sa samang higayon, giandam usab nila ang seguridad alang sa umaabot nga SONA, pagmonitor sa internal ug territorial security sa nasud.

-- ADVERTISEMENT --

Samtang, giablihan usab sa AFP ang tanan nilang Enhanced Defense Cooperation Agreement (EDCA) nga mga site isip nag-unang operation hubs alang sa humanitarian response effort.