Mipagawas na og pamahayag ang Armed Forces of the Philippines (AFP) kalabot sa mas agresibong pagpanghasi sa China ngadto sa mga personahe sa Philippine Navy atol sa resupply mission niadtong Lunes sa Ayungin shoal.
Gibutyag ni AFP chief General Romeo Brawner Jr. sa usa ka press conference atol sa iyang pagbisita sa Puerto Princesa, Palawan nga ang mga personahe sa PH Navy nakig-away gamit ang ilang mga kamot batok sa mga personahe sa Chinese Coast Guard nga armado og bolo sa dihang ilang gibabagan, gibangga ug gisakyan ang gagmay nga PH boat.
Matod niya bisan pa sa presensya sa mga armas sulod sa resupply boat sa PH Navy, wala kini gigamit tungod kay naglikay kini sa gubat.
Giduso hinuon sa mga personahe sa Navy ang mga rigid hull inflatable boats sa China Coast Guard aron di kini makabangga sa mga PH boats.
Samtang, gikompirmar ni AFP Western Command chief Rear Admiral Alfonso Torres Jr., nga gibuslotan sa mga personahe sa China Coast Guard ang mga inflatable boat sa PH Navy gamit ang ilang mga bolo.
Gikompirmar usab ni Torres nga 7 ka armas ang nasakmit sa CCG apan anaa ra kini sulod sa gun case ug wala magamit sa mga Pinoy atol sa resupply mission.
Ang mga opisyal sa AFP mihimo sa pagklaro nunot sa pagkabangga, pagbira ug pagkarga sa CCG personnel sa gagmay nga PH boat nga miresulta sa pagkaangol sa 8 ka PH Navy personnel lakip ang usa kansang tudlo naputlan sa insidente.
Diin ang aksyon nga gihimo sa CCG personnel giingong maoy control measures subay sa ilang gihingusgan nga soberanya sa halos tibuok katubigan nga gilalisan nga naglangkob sa kadaghanan sa West Philippine Sea nga anaa sa exclusive economic zone sa Pilipinas.
