Gikabutyag ni Lt.Col Israel Galorio, ang tigpamaba sa Arm Forces of the Philippines, Visayas Command nga diha diha dayun sila nihatag og mga personahe alang sa pagpatuman og search, rescue, and retrieval operations human niigo sa Amihanang bahin sa Sugbo ang 6.9 magnitude nga linog niadtong gabii sa Setyembre 30.
Atol sa pakighinabi sa Bombo Radyo Cebu team kang Galorio, iyahang naasoy nga sulod pa sa 6 ka oras human nahitabo ang maong linog, nag mobilized na sila og mga relief goods ngadto sa Bogo City, ingun man sa Daanbantayan, Cebu, agi og supporta sa provincial government, samtang naghimo nausab sila og rapid damage assessment.
Gitataw usab ni Galorio nga sa pagkakaron, anaa na sila sa relief and rehabilitation phase operation, inubanan sa Local Government Unit (LGU) ug DSWD diin sa sila sa AFP, igo og hatag suporta nalang pamaagi sa paghatag og manpower ingun man transportasyon aron mas mapadali ang paghatud sa mga hinabang sa mga apektadong dapit.
Sa pikas bahin, naasoy usab niini nga nag organisar kini sila og joint-task-force nga gilangkoban sa Navy, AFP, ug Army aron mohatag og assistance sa sakop sa mga Local Government Unit kabahin na sa relief and rehabilitation phase program.
