Gikumpirmar ni kanhi Armed Forces of the Philippines’ Western Command (AFP WESCOM) Commander Vice Admiral Alberto Carlos nga nakadawat sila og tawag gikan sa usa ka Chinese military attaché apan giklaro niya nga wala siya mosulod sa bisan unsang kasabotan nga maka-kompromiso sa nasudnong interes sa Pilipinas.
Kini ang unang higayon nga gitubag ni Carlos ang giingong Chinese military attaché sa pagdumala sa sitwasyon sa Ayungin Shoal sa West Philippine Sea, nga unang gibutyag sa Chinese Embassy sa Manila.
Atol sa imbestigasyon sa Senado sa giingong wiretapping sa Chinese Embassy, si Carlos miingon nga nakadawat siya og tawag sa telepono niadtong sayong bahin sa Enero gikan sa Chinese Military Attaché nga iyang giila nga “Senior Colonel Li” sa Chinese Embassy.
Dili mahatag ni Carlos ang tibuok ngalan sa attaché sa militar sa China apan, klaro nga niingon siya nga wa siyay gihimong ‘binding agreement’ tali sa Pilipinas ug China.
