CEBU CITY-Subay sa pagsaulog sa ika-87 sa Cebu City Charter Day, ang Kagamhanan sa Dakbayan sa Sugbo nagpahigayon og “Agri-Fishery Meat Products Display Fair” sugod gahapong adlawa Pebrero 19 hangtud karong umaabot nga Biyernes Pebrero 23, 2024.
Atubangan sa City Hall, adunay mga nagkadaiyang mga utanaon ug prutas nga gikan mismo sa mga mag-uuma sa 28 ka mga bukirang bahin sa mga barangay sa dakbayan ang mga produkto nga makita.
Ingon man nga gawas sa mga naasoy nga produkto, adunay mga naka-display nga mga lechon baboy, siomai, mga pagkaon nga makita sa kadalana ug uban pa.
Matud pa nga ang mga baligya sa agri-fishery fair ubos og P5 ngadto sa P10 ang presyo kung itandi sa Carbon Public Market.
Opisyal nga giablihan ang maong kalihokan pinaagi sa ribbon-cutting ceremony diin gipangulohan ni Mayor Michael Rama kauban niini ang iyang asawa nga si Malou Rama, ingon man anaa usab ang presensya ni Konsehal Jun Alcover Jr., Dr. Jessica Maribojoc, ug Joelito Baclayon ug uban pang mga ahensya.
