Gilusad karong buwana, Pebrero, ang AI Feb-Ibig sa Cybercrime Investigation Command Center Region 7, ug kini nagtumong sa pagpahimangno kabahin sa mga lovescams.
Tumong sa paglusad sa maong AI Feb-Ibig mao ang paghatag og pahimangno sa mga indibidwal sa mga posibilidad nga mamahimo silang biktima sa mga lovescams nunot na sa selebrasyon sa Valentines Day.
Gani, gitataw ni Florentino Somer, ang Field Officer sa Cybercrime Investigation and Coordinating Center, nga nagpadayon sila karon sa ilahang campaign sa mga katiguwangan, kinsa mao ang kasagaran mabiktima sa love scams.
Kini gumikan kay nag anam-anam naman og ka moderno ang panahon, hinungdan nga mas sayon na usab alang sa mga scammers ang pangpangilad pinaagi sa paggamit og Artificial Intelligence (AI), sama sa mga AI Videos aron makaagni sa mga katiguwangan nga mailad niini, ug mangayo og mga kantidad na.
Gidugang usab ni Somer nga ang AI Feb-Ibig usa ka National Campaign nga giulohang “Unmatch PH 2026: Umiwas sa AI, AI, AI-Feb-ibig” diin ang Cybercime Investigation and Coordinating Center gamiton ang ilahang monitoring aron sa pagmonitor sa mga posibleng madawat nga reklamo, ilabi na nga sa kasamtangan, nagkataas na ang ilahang reklamo nga nadawat sa ilahang buhatan.
Matod pa, gipahimuslan sa mga scammers ang teknolohiya sa Artificial Intelligence (AI) aron mapalig-on ang ilang emosyonal nga manipulasyon pinaagi sa mga peke nga pagkatawo ug awtomatikong panagsultisulti, butang nga nakapahimo sa “love scams” nga mas organisado ug delikado.
Tungod niini, ang kampanya nga UnmatchPH, nga gilunsad sa Scam Watch PH ug CICC niadtong 2024, padayon nga nagpahimangno batok sa unom ka sagad nga profile sa mga mangingilad sa nasod. Lakip niini ang “Sad Boi o Sad Gurl” nga mogamit og makaluluoy nga istorya aron makapangayo og kuwarta, ug ang “Seducer” nga mogamit og nindot nga hulagway alang sa blackmail.
Gawas sa maong mga profile, anaa usab ang “Investor” nga manghaylo sa peke nga cryptocurrency, ang “Serviceman” nga magpakaaron-ingnon nga sundalo sa gawas sa nasod, ug ang “Escort” nga mangayo og bayad sa dili pa ang panagkita.
Apan giklaro usab nga ang pinaka-delikado mao ang “Slow Burn” nga mokuha sa pagsalig sa biktima sulod sa taas nga panahon pinaagi sa mga simpleng istorya sa dili pa mangilad.
Busa, giawhag ang publiko nga magbinantayon ug i-report ang bisan unsang kadudahang kalihokan sa National Anti-Scam Hotline 1326 aron malikayan nga mabiktima niining mga cybercrime.
