Patay ang labing menos 46 ka mga Palestinian human sa duha ka managlahing air strike nga gilusad sa Israel sa tibuok gabii, sumala sa mga medics ug civil defense officials.
Lakip sa mga naigo mao ang Fahmi Al-Jargawi School sa Gaza City, nga nagsilbi nga dangpanan sa gatusan ka mga pamilya nga nawad-an sa pinuy-anan gikan sa lungsod sa Beit Lahia, nga sa pagkakaron giatake sa mga militar sa Israel.
Sumala sa usa ka tigpamaba sacivil defense sa Gaza, nga gipadagan sa Hamas, 20 ka mga lawas ang na-recover, apil ang mga bata, ug kadaghanan kanila grabeng nasunog human ang kalayo milamoy sa duha ka lawak-klasehanan nga gihimong puy-anan.
Ubay-ubay usab sa mga naluwas ang nakahiagom og kritikal nga mga samad.
Dugang sa taho nga ang mga gipatay naglakip ni Mohammad Al-Kasih, ang pangu sa imbestigasyon sa Hamas police sa amihanang Gaza, uban sa iyang asawa ug mga anak.
Ang duha ka mga pag-atake kabahin sa usa ka mas lapad nga opensiba sa Israel nga nakaabot sa amihanang bahin sa Gaza sa miaging semana.
Samtang sa habig sa Israeli Defense Forces (IDF), diin gikataho nga gitarget lang nila ang usa ka Hamas ug Islamic Jihad command and control center.
Gumikan matid pa nga ang lugar gigamit sa mga terorista sa pagplano og mga pag-atake batok sa mga sibilyan sa Israel ug mga tropa sa IDF ug giakusahan usab ang Hamas nga gigamit ang mga residente sa Gaza isip mga “human shields”.
