CEBU – Gilantaw karun sa Anti-Kidnapping Group (AKG) 7 ang koneksyon sa nahitabong kidnap for ransom sa unang semana sa Mayo diin ilahang nasikop ang duha ka Chinese national ug ang pag-kidnap usab sa 70-anyos nga Chinese, diin ilahang napatay ang laing upat ka mga Chinese nga suspek.
Gibutyag ni Police Lieutenant Zosimo Ravanes, Jr., ang AKG-7 Team Leader, nga gisusi kini nila karun gumikan kay susama lang ug modus ang mga naasoy nga kidnapper, diin managsusama lang ug sakyanan nga gigamit, ingon man nga pulos kini sila gikan sa Pasay City sa kaulohan.
Dugang pa ni Ravanes nga ang 70-anyos nga biktima kay taga Fujian, China ug adunay mga suspek nga lumad usab sa naasoy nga probinsiya.
Wala usab giwakli sa AKG-7 ang posibilidad nga adunay nagsugo sa maong mga Chinese kidnappers, ingon man ang ilahang pagsusi sa gitawag nga ‘financier’ sa mga suspek nga giingong gamhanan kung hisgutan ang kidnapping.
Sa pagkakarun, padayon ang ilahang imbestigasyon ug gisiguro nga tutokan ang naasoy nga serye sa ‘kidnapping’ diin nalambigit kay pulos lang usab mga Chinese.
