Gikatahong namatay ang dose-dosenang mga tawo human sa usa ka pagbuto nga nahitabo sa amihanang Myanmar niadtong Domingo.
Nahitabo ang insidente mga alas 12:00 sa udto kagahapon sa lungsod sa Namhkam.
Usa ka first responder sa distrito sa Namhkam sa estado sa Shan miingon nga 46 ka mga tawo ang namatay, lakip ang mga bata samtang kapin sa 70 ang nasamdan.
Laing rescuer miingon nga ang kinatibuk-ang ihap sa mga biktima niabot na sa 59.
Ang Ta’ang National Liberation Army (TNLA), usa ka prominenteng ethnic armed group sa nasud, miingon nga ang pagbuto gipahinabo sa usa ka aksidenteng pagbuto sa gitipigan nga mga eksplosibo nga gigamit sa pagmina ug quarrying.
Wala pa gipagawas sa grupo ang piho nga gidaghanon sa mga biktima samtang nagpadayon ang imbestigasyon sa eksaktong hinungdan sa insidente.
Giingon usab sa TNLA nga ang mga eksplosibo iya sa departamento sa ekonomiya niini, ug gisusi pa nila kung unsa ang hinungdan sa pagbuto.
Kahinumduman nga ang Myanmar nagpabilin sa civil war sukad nga giilog sa militar ang gahum niadtong 2021, nga misangpot sa padayon nga panag-away tali sa mga pwersa sa junta ug lainlaing mga pro-democracy ug ethnic armed groups.
