CEBU CITY- Nasikop sa mga Pulis ang usa ka aktibong pulis kinsa nadestino isip desk officer sa Station 6 sa Mandaue City Police Office(MCPO) atol sa buybust operation sa may C. Padilla St., Brgy. Mambaling, Cebu City.
Giila ang dinakpan nga si PSSg Niesel Artizo Pescante o mas naila nga “Mr. Nice” 33-anyos, minyo, taga Liloan, Cebu.
Sa nasangpit nga buy-bust operation, nakuhaan si PSSg Pescante og duha ka medium, duha ka large size sa gituohang shabu nga motimbang og 60 gramos nga adunay Standard Drug Price value nga P408,000, ingon man buy-bust money.
Narekober usab gikan sa suspek ang usa (1) ka unit nga giisyu sa PNP nga armas nga adunay magazine ug 14 ka buhing bala.
Una niini, gilusad ang joint operation batok sa Pescante diin nagtinabangay ang RPDEU7, Stations 6 ug 11, CDEU-CCPO ug PDEG SOU7 aron masikop ang subject.
Sa pagkakaron, gitumbok pa kung kinsa pa ang kauban sa mao nga pulis nga nagdumili sa pagbutyag kon kinsa ang iyang amo.
Mag-atubang PSSg Pescante og kasong pagpamaligya ingon man paghupot og ginadiling drugas diin gawas sa kasong criminal mag atubang usab kini og kasong administratiba nga posibling maoy hinungdang sa pagkatangtang niini sa serbisyo.
