Nakonbikto sa kasong graft ang usa sa mga akusado sa kontrobersyal nga P24-million textbook scam niadtong 1998, nga si Mary Ann Maslog human mamatud-an nga sad-an sa Sandiganbayan.
Sa promulgation nga kaso,gisentensiyahan sa Sandiganbayan Second Division si Maslog og hangtod sa 10 ka tuig nga pagkapriso.
Una niini, giakusahan si Maslog, kauban ang 2 pa nga sila si Emilia Aranas ug Ernesto Guiang, tungod sa pagpameke sa mga record sa secure payments gikan sa Department of Budget and Management.
Diin ang iyang mga kauban nga sila si Aranas ug Guiang, susamang nakonbikto usab ug gisentensiyahan sa anti-graft court sa labing taas nga 10 ka tuig nga pagkapriso niadtong 2020.
Ingon man nga nabutang sa archive ang kaso ni Maslog human gikataho nga mitaliwan kini niadtong 2019.
Apan niadtong Setiyembre 25, 2024, nadiskubrehan sa National Bureau of Investigation (NBI) nga buhi pa siya human ang iyang fingerprint mitugma sa alyas nga iyang gigamit nga si Jessica Francisco, kinsa napriso tungod sa pagkalambigit sa laing scam.
