Viral karon ang gi-shared nga post sa aktor nga si Alden Richards sa iyang Instagram Story, nga nagpasabot sa kahulogan sa pulong nga “kuracaught” nga nagtumong sa mga kurakot nga opisyal nga nasakpang nangawkaw.
Bisan og wala siya maghisgot og pangalan ni bisan kinsa, nagduda ang mga netizen nga ang iyang gipasabot mao si Arjo Atayde, ang bana ni Maine Mendoza, kinsa gipasanginlan sa anomalosong flood control projects.
Kahinumduman nga nahimong loveteam sila si Alden ug Maine isip “AlDub” sa usa ka noontime show.
Bisan pa sa mga pasangil batok kang Atayde, hugot nga gidepensahan ni Mendoza ang iyang bana nga nagkanayon nga ang ilang bahandi gikan sa kaugalingon nilang paningkamot ug dili sa kwarta sa katawhan.
Sa samang higayon, gipaambit usab ni Alden ang mga hulagway bahin sa isyu sa kurapsyon, lakip na ang viral nga hulagway sa mga pundok sa kuwarta nga nasakmit gikan sa buhatan sa Department of Public Works and Highways, nga kasamtangang giimbestigahan sa Kongreso.
