Posibleng mosaka sa alert level 4 ang kahimtang sa Canlaon City tungod sa hulga nga mahimong magmatic eruption ang bulkang Kanlaon.
Hinungdan nga usa sa mga rason nga giduso ang mandatory evacuation order nga gipangulohan sa Task Force Kanlaon alang sa mga pamilya nga nagpuyo sulod sa 6-kilometer permanent danger zone (PDZ) duol sa Mt. Kanlaon taliwala sa padayon nga pagbuto sa bulkan.
Giisyu ni Office of Civil Defense (OCD) Western Visayas Director Raul Fernandez ang direktiba pinaagi sa memorandum order niadtong Domingo.
Diin gimanduan sa OCD ang mga local government units sa probinsya sa Negros Occidental ug Negros Oriental, sa usa ka tigom niadtong Disyembre 14, nga tapuson na ang pagbakwit sa mga residente niadtong Lunes.
Atol sa pakighinabi sa Bombo Radyo Cebu ngadto kang Ma. Lyn Bustillo, usa sa mga maestra sa Matagrak Elementary School-Canlaon City, gipaambit nga daghan na ang namakwit sa mga evacuation areas ilabina niadtong anaa sa 6-kilometer zone ug kasikbit nga mga lugar nga mipili sa pagbiya aron masiguro ang ilang kaluwasan.
Sama sa pamilya ni Bustillo nga bisan anaa kini sa 7-kilometer zone kay naniguro na ang uban sa ilaha nga mobakwit aron masiguro ang ilang kaluwasan ug kon gani mas mograbe pa ang sitwasyon.
Gihulagway usab ni Bustillo nga halos dili na makita ang bulkan tungod sa madag-umon nga palibot ug sa hulga sa pag-uwan, hinungdan sa dugang kahadlok tungod sa kabalaka nga mobuto balik ang bulkan.
Samtang gipaambit usab niini ang kapaspas ug pag-atiman sa mga evacuation centers aron mahatag ang mga hinabang ingon man nga nag-unang panginahanglanon sama sa pagkaon, medical assistance ug daghan pang uban.
