METRO MANILA-Gihimakak ni dismissed Bamban mayor Alice Guo nga adunay mitabang sa iyaha nga opisyal sa gobyerno ug Pilipino aron maka-ikyas kini sa Pilipinas.
Ang pagdumili ni Guo nitumaw human gikuwestiyon nila ni Senador Risa Hontiveros ug Jinggoy Estrada atol sa pagdungog sa Senate Committee on Women and Children kung kinsa ang nitabang niini arun makagawas sa nasud.
Gisaysay ni Guo nga sila si Shiela ug Wesley Guo misakay og yate aron makaikyas sa Pilipinas.
Gikan sa usa ka pier sa Manila, misakay sila sa usa ka yate human sa pipila ka oras nibalhin sila sa mas dakong barko.
Matod niya nga tulo ngadto sa lima ka adlaw silang nagpabilin sa dakong barko diin usa ra sila ka lawak.
Wala gisapubliko ni Guo kon kinsay tag-iya sa yate apan iya kining gisuwat sa papek nunot sa hangyo sa mga senador.
Mopatim-aw nga usa ka Chinese national ang nagpadali sa ilang pag-ikyas gikan sa Pilipinas niadtong Hulyo.
Tungod sa pag-insister ni Guo nga wala’y Pilipino nga mitabang kanila, wala motuo si Estrada ug niingon nga imposible.
