CEBU CITY-Patay ang usa ka anak nga 28-anyos nga lalaki human gipusil sa iyang amahan gumikan sa panaglalis sa Lower Laguerta, Barangay Lahug sa dakbayan sa Sugbo, Lunes sa gabii, Marso 25.
Sa pakighinabi sa Bombo Newsteam ni Police Major Romeo Caacoy Jr., ang hepe sa kapulisan sa Mabolo Police Station, gitino niini nga basi sa imbestigasyon nga ilahang gipahigayun nag-away ang biktima ug ang inahan niini.
Hinungdan nga gibadlong sa amahan ang iyang anak, apan nasuko kini ug gi bunalan hinuon sa anak ang iyahang amahan ug kahoy sa liog, butang nga nakapatukmod sa amahan nga mokuhag armas ug gipusil ang biktima sa ulo gamit ang dili lisensyadong armas nga maoy hinungdan sa kamatayon niini.
Dugang pa, nga ang biktima gidala pa sa Cebu City Medical Center apan gideklarar nga dead on arrival.
Giila ang amahan nga si Eugenio Caballes 63,-anyos habal-habal driver ug ang anak nga si Kenn Pondar Caballes, 28-anyos.
Kasamtangang gitanggong sa Mabolo Police Station ang amahan human nga boluntaryong nitahan.
Kung diin Kasong Parricide ang ipasaka batok sa amahan.
