LAPU-LAPU CITY,CEBU- Namatay ang usa ka mananagat human gituohang naigo sa kilat sa kadagatan sa Brgy. Punta Engaño, Sitio Kalipayan, Dakbayan sa Lapu-Lapu kagahapon sa hapon, Agosto 5, 2025.
Ang biktima mao si Teodilito “Opaw” Entan, 38 anyos, residente sa maong lugar. Siya nakita nga nagbitay na lang sa iyang gamay nga baroto nga nasudlan og tubig ug buslot na ang ubos niini.
Nasuta nga nagsugod og panagat si Opaw mga alas 3 sa hapon, bisan paman nga bati na ang panahon.
Kini gikompirmar sa iyang kauban og barkada nga si Elvis Eyas, nga kauban usab niya sa panagat.
Matod ni Eyas, nag-una na siya og panagat ug nakamatngon nga nagdag-om ug nagsugod na og kusog ang hangin, rason nga nibalik siya sa baybayon.//
Si Opaw, bisan sa maong kahimtang sa panahon, mipadayon sa pagpanagat.
Wala na kini makauli hangtod sa pagkagabii.
Nakita na lang siya nga wala nay kinabuhi, nagbuy-od sa iyang baroto. Adunay dako nga paso sa iyang lawas, ug samad sa ulo ug nawong – hinungdan nga gituohang naigo kini sa kilat.
Sa pakighinabi sa Bombo Newsteam sa asawa niini nga si Teresita Cocay, iyahang gipaambit nga aduna silay walo ka mga anak, ug ang kamagulangan anaa pa sa 17 anyos.
Sa pagkakaron, giandam na ang lawas sa biktima alang sa iyang paglubong, nga gibutang sa ilang panimalay daplin sa baybayon.
Hinungdan, nga nanawagan ang asawa nga si Teresita, nga unta matagaan silag supporta sa kagamhanan sa Dakbayan sa Lapu Lapu, alang sa ilang panginabuhian,ilabi na nga mga bata pa ang ilahang mga anak.
