CEBU – Dili makatuo ang amahan ug anak nga sila si Bernardo Belarmino, 57, ug Marie Bernardine Belarmino, 26, taga Barangay Bonga, Bacacay, Albay nga naabot na nilang duha ang ilang pangandoy nga mahimong abogado.
Kini human sa gipagawas nga resulta sa 2022 Bar Exam niadtong adlawng Martes, ilahang nahibal-an nga sila mismong duha ang nakapasar.
Unang nigradwar sa pagka-abogado sa University of Santo Tomas College of Law sa Legazpi ang amahan nga si Bernardo niadtong 1991 apan karon lang naswertehan nga makapasar sa bar exam sa ika-pitong higayon.
Samtang, first take usab kini sa iyahang anak nga si Bernardine nga nitapos sa abogasya sa susamang tunghaan niadtong 2020.
Wala magkuyog ang duha dihang nahibal-an ang resulta sa bar exam gumikan puros kini anaa sa trabaho.
Gipaambit ni Bernadine nga bata palang kini pangandoy na niini nga mamahimong abogado ug ang iyahang amahan usab ang nagsilbing inspirasyon aron sya maningkamot nga makab-ot ang pangandoy.
Kasamtangang nagtrabaho si Bernardine sa usa ka law office isip kawani ug ang iyang amahan nga si Bernardo nagtrabaho usab sa Department of Agrarian Reform sulod sa 31 ka tuig.
