Cebu City– Gihimakak sa kapulisan nga duna silay kalambigitan sa nahitabong pagpamusil patay sa lima ka mga tawo sa Brgy Malubog, bukirang bahin sa dakbayan sa Sugbo.
Kini human sa pagpatim-aw sa duha ka mga tawo kinsang nangangkon nga nakaluwas sa giingong pag salvage kanila sa mga armadong lalaki nga gituohan nilang sakop sa kapulisan
Matud ni Police Chief Supt Debold Sinas, ang Regional Director sa Police Regional Office 7, na busy sila sa pag implementar sa One Time Bigtime sa tibuok isla sa Sugbo ug wala silay labot sa nahitabo sa alegasyon nilang Antonio Belande, usa ka habal habal driver ug lumad nga taga Brgy Basak San Nicholas ug Sharmaine Puron, residente sa Brgy Mambaling dakbayan sa Sugbo.
Matud ni Sinas nga spekulasyon lamang kadto sa duruha gumikan sa ilang kasinati-an. Bisan pa man niini, andam ang director sa kapulisan nga magpaidalum sa unsa man nga imbestigasyon ang ipahigayon. Gi-estorya usab niini silang Puron ug Belande ug gipasiguro ang ilang kaluwasan.
Una niini, giangkon nilang Belande ug Puron nga gi pick up sila sa wa mailhing mga lalaki nga ilang gituohan nilang sakop sa kapulisan human nga duna silay gihatud sa usa ka dakong establishimento sa Brgy Banawa.
Gipasakay matud pa sila sa sakyanan diin gitaptapan ang ilang nawong ug gihiktan ang ilang mga kamot.
Sa pagkakaron dili pa makaingon ang kapulisan kung ambush o salvage ang nahitabo.
