Gipasakaan na sa nagkadaiyang kaso ang usa ka 59-anyos nga American retired investor human ming-abuso sa siyam ka babaye, lakip ang mga menor de edad, ug sa giingong pagpugong kanila sa paggawas sa iyang condominium unit sa Dakbayan sa Sugbo.
Sumala kang Police Lieutenant Colonel Rolan Aliser, spokesperson sa Police Regional Office 7, pormal nang nasang-at ang mga kaso batok sa suspek nga giila sa alyas nga Jonathan, nga gikataho nga taga-Missouri, United States.
Lakip sa iyang giatubang ang kasong rape, illegal detention, ug paglapas sa Section 11, Article II sa Republic Act 9165 o Comprehensive Dangerous Drugs Act of 2002.
Gipasabot ni Aliser nga base sa imbestigasyon sa mga operatiba sa Inayawan ug Abellana Police Station, uban sa Inter-Agency Council Against Trafficking o IACAT, dul-an sa napulo ka mga babaye ang giingong gidala ngadto sa condominium unit sa suspek ug gipugngan nga makagawas.
Gipugngan sa kapulisan ang pagpagawas sa dugang detalye kalabot sa kaso tungod kay pipila sa mga giingong biktima mga menor de edad.
Sa pagkakaron, anaa na sa kustodiya sa Department of Social Welfare and Development o DSWD ang mga giingong biktima ug nagadawat og mga serbisyo sa interbensiyon.
Samtang, nagpabiling balhog sa Abellana Police Station ang suspek.
Dugang pa niini, nagpahigayon na usab ang Cebu City Police Office og background investigation aron matino kon aduna ba kiniy criminal records o pending cases sa Estados Unidos, pinaagi sa pakigtambayayong sa mga may kalabotang ahensiya.
Kahinumduman nga nidtong Oktubre 13, nadawat sa Abellana Police station ang taho gikan sa duha ka medor de edad diin giakusar ang suspek nga giingong nihimo og seksuwal nga pag-abuso sulod sa iyang condominium unit sa Winland Tower One, sa Barangay Kamputhaw.
