Dead on the spot ang usa ka American-national human milayat sa 8th floor sa usa ka hotel sa Brgy. Mabolo, dakbayan sa Sugbo niadtong Oktubre 29 sa hapon.
Giila ang biktima nga si Michael Douglas Hunter, 66 anyos, ug adunay karelasyon nga Pilipina.
Matud sa hepe sa Mabolo Police Station nga si Police Major Dindo Alaras nga nagkuyog silang Hunter ug ang hinigugma niini sa usa ka hotel.
Gisaysay sa girlfriend sa biktima nga pipila ka adlaw nang naghilom-hilom ang American national ug mibahad kini nga maghikog.
Dugang pa ni Alaras nga wala gayud makatuo ang girlfriend nga gitinuod sa biktima ang maong paglayat gikan sa balkonahe.
Base sa nahipos nga CCTV footage, mideretso si Hunter ngadto sa balkonahe sa hotel ug diha na gibuhat ang maong insidente.
Apan wala hinuon matino sa kapulisan kung unsa ang motibo, ingon man problema ang gi-atubang sa American-national nga maoy nagtukmod sa iyang paghikog.
Sutaon pa usab ni Alaras kung aduna bay nahitabong foulplay subay na sa maong insidente.
Naningkamot karon ang kapulisan nga makig-communicate sa pamilya o suod nga higala sa biktima aron masuta kung unsang problema ang gi-antus sa American-national. (gn)
