Gisusi karon sa Anti-Money Laundering Council (AMLC) ang pipila ka mga ngalan sa mga kontraktor nga giingong nalambigit sa mga iregular nga flood control projects, sumala ni Bangko Sentral Governor ug AMLC Chairman Eli Remolona.
Sa usa ka pakighinabi, si Remolona niingon nga ang AMLC nakadawat og mga kadudahang transaction reports gikan sa mga bangko, ug kung adunay pangalan nga makita, busa ila dayon kining imbestigahon, ug matod niya nga daghan na sila karon nga gitan-aw.
Kahinumduman nga si Presidente Ferdinand Marcos Jr., niingon nga 15 lang ka mga kontraktor ang nakakuha sa 20% sa halos 10,000 ka flood control projects sukad niadtong 2022.
Gumikan niini, nipasidaan ang usa ka magbabalaod sa Kamara nga iyang ipatawag ang mga opisyal, kontraktor, ug mga magbabalaod kung mapamatud-an nga nalambigit sila sa mga anomaliya sa pagkontrolar sa baha o ubang mga proyekto sa imprastraktura.
Samtang, ang Commission on Audit (COA) nimando og in-person technical inspection sa tanang flood control projects sa Bulacan.
Isip kabahin sa reporma, daghang ahensya sa gobyerno lakip na ang DBM ug DICT ang nilusad og online portal diin ma-monitor sa publiko ang pag-uswag ug pondo sa mga flood control projects sa nasud.
