Inspeksyonun sa Kagamhanang dakbayan sa Sugbo ang mga amusement rides nga anaa sa syudad aron sutaon sa kalidad sa kaluwasan niini nga dili makapahinabo og risgo sa mga manakayay karong holiday season.
Kini ang gipamahayag ni Cebu City Councilor Dave Tumulak, ang Chairman sa Cebu City Disaster Risk Reduction and Management Council (CCDRRMC) atol sa eksklusibong pakighinabi sa Bombo Radyo Cebu News Team diin gipahibalo niini nga karong adlawa nibalik sa operasyon sa pag-inspeksyon ang mga sakop sa Cebu City Office of the Building Official (OBO) aron sa striktong pagsuta sa mga kahimtang sa mga amusement rides sa mga mechanical movements niini.
Gironda niini ang mga peryahan sa nagkadaiyang dapit sa dakbayan nga mao ang anaa sa Barangay Carreta, Plaza Independencia (Fort San Pedro), N. Bacalso Ave. (duol sa Cebu City Medical Center), ug sa South Road Properties (SRP).
Tinguha sa inspeksyon nga nagpabiling luwas ang mga amusement rides sama sa Vikings, Ferris Wheel ug uban pa nga nakaserbisyo og mga manakayay niadtong disperas ug adlaw sa Pasko ingon man nga sa umaabot pud nga adlaw sa pagsugat sa Bag-ong Tuig.
