CEBU CITY — Mag-atubang og kasong parricide ang usa ka 38-anyos nga babaye kinsang gituohang mipatay sa kaugalingong inahan sa Brgy. Cansalonoy, lungsod sa Ronda, Cebu.
Base sa imbestigasyon sa Ronda PNP, naglalis ang suspek nga si Rowena Allawan ug ang biktimang si Rufina Allawan, 73 anyos sa wala pa matinong hinungdan.
Matud ni Police Staff Sergeant Josephus Diana sa Ronda PNP, nabantayan sa mga silingan nga naglalis ang duha kagahapon sa buntag hangtud nga kalit lang nga nihilom human nihangyo ang inahan nga ihunong na.
Pagkalabay sa pipila ka gutlo, nabantayan sa mga ig-agaw nga nagbitbit og tubo nga puthaw ang suspek tapad sa inahan kinsang nagkadugo ang iyang ulo.
Gibana-banang anaa sa 38 centimeters ang tubo nga gigamit ni Rowena sa gituohang pagpamunal sa kaugalingong inahan.
Gidala sa tambalanan ang biktimang si Rufina apan gideklarar kini nga dead on arrival.
Gi-turnover na karon sa kapulisan ang suspek ug natanggong karon sa Ronda Police Station.
