Cebu City-Patay ang usa ka anak human kini ang giunay sa pagduslak sa iyang kaugalingong amahan sa Brgy. Northern Poblacion, lungsod sa San Francisco
Ang biktima mao si Jessi Dichosa, 38 anyos samtang ang suspetsado mao ang 60 anyos nga amahan niini nga si Rodrigo Dichosa. Basi sa imbestigasyon sa San Francisco PNP, gibutyag ni PSI Janus Dichosa, hepe sa kapulisan, nga naa sa impluwensya sa makahubog nga ilimnon ang suspetsado sa dihang nahitabo ang insidente. Matud pa nga naabtan sa suspek ang apuhan niini nga gitamparos sa biktima hinungdan nga mikuha kini ug sundang nga maoy gigamit sa pagdunggab sa biktima. Giduslak niini sa ilukan nga bahin ang biktima nga maoy hinungdan sa iyang kamatayon.
Matud naman sa mga kabanay sa duruha nga tiggamitan kaniadto sa ginadiling drogas ang ang suspek nga si Rodrigo apan nahunong kini sa dihang wala nay namaligya sa ilang lugar. Matud pa nga kanunay nilang mabantayan nga murag wala sa iyang kaugalingon ang suspek.
Sa habig usab sa suspek, gibutyag niini nga wala siya kahibaw sa iyang gibuhat atong panahuna sanglit susamang na wala siya sa iyang kaugalingon.
Mihangyo pa unta ang suspek nga mutambong sa lubong sa iyang anak apan wala kini tuguti sa kapulisan gumikan kay walay court order.
Kasamtangang natanggong karon sa San Francisco PNP lock-up cell ang suspek ug gi andam na ang tukmang kaso nga ipasaka batok kaniya.
