CEBU CITY-Midangop sa Bombo Radyo Cebu ang Mayor sa lungsod sa Barili, probinsya sa Sugbo nga si Mayor Marlon Garcia human nabiktima iyang anak nga Grade 3 sa bullying sa St. Benedict Childhood Education Centre apan matod pa wala’y aksyon ang skwelahan.
Gibutyag ni Garcia nga 3 na ka insidente ang nahitabo apan wala ray gibuhat ang skwelahan isip pag disiplina sa bata nga nang-bully. Gani dili lang matud pa iyang anak ang biktima niini apan adunay daghan na nga mga ginikanan ang nangreklamo kabahin niini.
Una nga insidente nahitabo niadto pang nakalabay sa Agosto 2019 ug nausban kini sa milabay nga semana. Sa susama nga higayon. wala lang gihapon matud pa’y gibuhat ang maong tunghaan.
Nasayran nga adunay gisukmag, gipatiran ug gipaak apan wala matud pa’y gibuhat ang eskwelahan. Sigon pa usab sa Mayor nga 6 na ka tuig nga nag-tungha ang iyang anak sa maong tunghaan apan hangtod karon wala siya nakakita nga adunay students handbook nga gihatag ang St. Benedict.
Dugang pa ni Garcia nga ika-pila na kini nga higayon nahitabo apan wala gayud sila gipatawag sa maong tunghaan.
‘DILI TINOOD’
Gihimakak ni Raffy Ballesteros kinsang principal sa St. Benedict Childhood Education Centre ang alegasyon ni Barili Mayor Marlon Garcia nga wala silay gibuhat nga aksyon kabahin sa bullying sa maong tunghaan.
Matud ni Ballesteros sa dihang nahinabi sa Bombo Radyo Cebu nga kun adunay reklamo nga maabot sa iyang opisina dali kini nila’ng hatagan og aksyon. Ingon man usab, aduna matud pa silay procedure nga gi-sunod sa tunghaan kun ugaling adunay mga “bullying” nga mutumaw.
Gihimugatan ni Ballesteros nga dili dali mag disiplina og mga bata apan ilang gibuhat kun unsay angayan nga buhaton kun ugaling adunay susama niini nga panghitabo.
Gihimug-atan sa principal nga sa ika-duha nga higayon nga nahitabo ang maong pagpang-bully nagpahigayon sila ug conference ingon man gi-suspenso usab ang maong studyante. Dugang pa niini, usa matud pa sa mga lakang nga gibuhat sa skwelahan mao ang pag ‘supervise’ sa ‘lunch time’ sanglit niining higayona mahitabo ang pag pang-bully.
Samtang abli kanunay ang sibyaanan sa Bombo Radyo alang sa naasoy nga tunghaan kun aduna pa sila’y dugang nga statement. | Via Bombo Lahvi Quinones, IRS
