Niduyog sa kaguol sa pamilya sa mipanaw nga student-athlete nga si Rene Baterbonia ang sikat nga aktor nga si Gerald Anderson ug aktres nga si Claudine Barretto pinaagi sa personal nga pagbisita sa haya niini.
Sa usa ka Facebook post, dako ang pasalamat sa kanhi coach ni Baterbonia nga si Jess Linus Evangelio, o nailang “Coach Jess,” ngadto kang Gerald tungod sa paggahin og panahon sa pag-adto sa haya didto sa Quezon City.
Una nang nagpadayag sa iyang kasubo si Gerald sa pagpanaw sa batan-ong atleta, diin gipaambit niini nga nakaduwa pa niya si Baterbonia sa basketball kapin duha ka bulan una nahitabo ang trahedya.
Matud sa aktor, usa ka dako nga kawalan sa basketball world ang pagkamatay sa usa ka batan-on nga aduna unta’y hayag nga ka-ugmaon.
Sa laing bahin, nikatap usab online ang mga video sa pag-abot ni Claudine Barretto sa haya. Nakita ang aktres nga naggakos ug naghatag og suporta sa inahan ni Baterbonia sa wala pa ibalik ang patay’ng lawas sa atleta ngadto sa ilang lungsod sa Agusan del Sur.
Si Baterbonia, kinsa nagpangedaron og 19 anyos, usa sa duha ka magduduwa sa men’s basketball team sa Ateneo de Manila University nga nakalas atol sa usa ka team-building activity didto sa Dipaculao, Aurora niadtong Hunyo 8, 2026.
Kauban niya nga namatay ang kaubang magduduwa ug Nigerian national nga si Divine Adili, 21 anyos, diin human sa maong trahedya, ubay-ubay pang mga inila nga personalidad sama nina Gary Valenciano, Gretchen Ho, ug Regine Velasquez ang nagpadayag sa ilang pahasubo ug nanawagan og mas tinawag nga eksplikasyon kalabot sa maong insidente.
