Mas lagmit nga mopadayon ang Anti-Political Dynasty Bill, human sa pamahayag sa Malacañang nga gisuportahan niini ang pagpasar sa maong balaod.
Mao kini ang nakita ni Senador Bam Aquino — kinsa giangkon usab nga kabahin sa pamilyang politikal.
Sumala ni Aquino, sa wala pa ang anunsyo sa Palasyo, naghunahuna siya nga “lisod” gihapon ang pagpasar sa balaodnon bisan pa nga naka-file na sila sa ilang kaugalingong bersyon.
Sa dihang gipangutana kung panahon na ba nga sertipikahan ang Anti-Political Dynasty Bill isip urgent, ang senador miingon nga bisan kung kini usa ka positibo nga simbolo kung kini ideklarar nga urgent, dili kini kinahanglan niining panahona.
Busa, naglaum si Aquino nga ang committee report sa balaodnon ipagawas sa sayong bahin sa sunod tuig aron makasugod na ang mga deliberasyon.
Samtang, giangkon ni Senador Kiko Pangilinan nga ang pagpasar sa Anti-Political Dynasty Law dili sayon, labi na kay kini na-pending sulod sa upat ka dekada.
Bisan dugay na kining wala pa maaprobahan, nanawagan ang senador nga suportahan sa mayoriya sa Kongreso ang pag-uswag sa balaodnon, samtang nag-ingon nga ang sugyot nakaabot na sa committee report ug kinahanglan nga ipadayon alang sa plenaryo nga deliberasyon.
Gipasiugda usab ni Pangilinan nga adunay 10 ka petisyon nga wala pa maaprobahan sa Korte Suprema nga naghangyo nga ideklarar nga unconstitutional ang mga political dynasties.
Matod niya nga ang mga mahistrado kinahanglan nga magtuon ug modesisyon niini.
