Gikatakdang moluwat og show cause order (SCO) ang Commission on Elections (COMELEC) batok kang incumbent Duterte Youth party-list Rep. Drixie Mae Cardema tungod sa pasangil nga dili tinuod nga apelyido si “Cardema” nga gigamit niini.
Matod ni Comelec Chairperson George Garcia, ilang hangyoon si Drixie Mae, ang unang nominado sa party-list group, nga ipasabot ug hatagan og katin-awan ang pasangil nga nikatap sa social media.
Dugang pa, giakusahan siya nga naggamit og lain nga family name, diin adunay mga taho nga nag-ingon nga ang tinuod nga apelyido ni Drixie Mae, kay Suarez ug dili Cardema.
Ang gideklarar nga tibuok ngalan ni Drixie Mae kay “Drixie Mae Suarez Cardema,” subay sa iyang Certificate of Acceptance of Nomination (CONA) alang niadtong May 12 election.
Gitataw usab ni Garcia nga ang pag-isyu og SCO gihimo “motu proprio” aron mahatagan og kahigayonan ang Duterte Youth official sa pagpasabot sa iyang habig.
Apan, ugaling mapamatud-an nga siya mihimo og bakak nga deklarasyon sa iyang CONA, si Drixie Mae mahimong manubag sa usa ka election offense. | Bombo Irene Ardiente
