CEBU CITY-Gipangandaman karun sa Archdiocese of Cebu alang sa umaabot nga National Retreat for Priests 2023 nga ipahigayon sa IEC Convention Center sa dakbayan sa Sugbo.
Ang maong kalihokan kay mao ang panagtapok sa mga kapari-an arun sa paghatag og higayon sa ilahang mga kaugalingon nga mag-‘reflect’ sa ilahang mga kaugalingon isip mga ‘ministers of God’.
Gibutyag ni Most Reverend Ruben Labajo, Auxiliary Bishop of Cebu, nga ang lihok ug pamatasan sa kapari-an kay makaapekto gayud sa kinabuhi sa mga tumutuong Katoliko.
Matud pa, ang lihok ug pamatasan sa kapari-an kay mamahimong makapalig-on o makaguba sa pagtuo sa usa ka Katoliko hinungdan nga importanti ang maong oportunidad nga malantaw ug masusi pagbalik ang ilahang mga kaugalingon isip mga pari.
Ipahigayon ang National Retreat for Priests 2023 karung Nobyembre 7 hangtod na sa Nobyembre 9 ning tuiga.
Sa pagkakarun, mikabat na sa 2,300 sa tibuok nasud ang nakaparehistro alang sa maong kalihokan.
Kahinumdoman nga una nang gipahigayon ang maong retreat niadtong Enero 2010 sa Pasay City sa kaulohan kung diin gitambongan kini sa 5,000 ka mga pari lukop Pilipinas, ingon man ang mga Pilipino nga pari kinsang nag-serbisyo sa ubang nasud.
