Masaligon si Cebu City Mayor Nestor Archival nga ang siyudad makatuman sa mga direktiba sa Department of Environment and Natural Resources (DENR) human sa mga reklamo bahin sa baho nga nasinati sa mga katawhan gikan sa temporaryong gitambakan sa basura sa South Road Properties (SRP).
Matod ni Archival, malaumon siya nga ang SRP mobalik sa normal sa dili madugay, samtang ang siyudad motubag sa mga isyu nga gipatungha sa DENR.
Ang DENR naghatag sa Gobyerno sa Dakbayan sa Sugbo og 60 ngadto sa 90 ka adlaw aron limpyohan ang temporaryong dapit nga gitambakan og basura.
Ingun man nga sundon ang mga kinahanglanon sa kalikopan sa ahensya human sa pag-isyu og Cease and Desist Order (CDO).
Diin matod ni Archival, sigurado siya sa gipangayo sa DENR, ug ma-comply sa dakbayan ang gihatag sa DENR nga 60 ngadto sa 90 ka adlaw aron limpyohan ang SRP, ang dapit nga gitambakan karon og mga basura.
