CEBU CITY- Gikondenar ni Cebu City Mayor Nestor Archival ang pagpatay sa 24-anyos nga si Isaac Virgel Viernes, kansang patayng lawas nakit-an sa usa ka bakanteng lote sa Citilink, Barangay Pahina Central, Siyudad sa Sugbo, niadtong Lunes sa hapon, Oktubre 19, 2026.
Sa pakighinabi sa Bombo Radyo Cebu, nagpahayag si Archival sa iyang pahasubo sa pamilya sa biktima ug nanawagan sa Cebu City Police Office (CCPO) nga paspason ang imbestigasyon aron masiguro nga ang mga responsable sa krimen mailhan ug manubag sa balaod.
Gipadayag usab sa mayor ang iyang pagdayeg sa Cebu City Disaster Risk Reduction and Management Office (CCDRRMO) ug sa mga personahe niini tungod sa ilang dali nga pagresponde ug tabang sa pagkuha sa patay nga lawas.
Giawhag usab ni Archival ang publiko nga ipaambit ngadto sa mga awtoridad ang bisan unsang impormasyon nga makatabang sa imbestigasyon.
Sa samang higayon, iyang gipasiugda ang pagrespeto sa pribasiya sa pamilya sa biktima samtang nag-atubang sila sa maong trahedya.
Gikatahong nawala si Viernes sulod sa halos duha ka semana sa wala pa nakaplagan ang iyang patayng lawas sa maong lugar.
Sa pagkakaron, nagpadayon ang imbestigasyon sa kapulisan, lakip ang pagrepaso sa mga CCTV footage ug ang pagkuha sa mga pahayag gikan sa mga tawo nga giila nga posibleng adunay kalabotan sa kaso.
