Dili gihapon katuo sa kalampusang nakab-ot ang lumad nga Argawanon nga si Christel Zamora De los Reyes sa pagkab-ot niini sa Rank 1 sa Licensure Examinations for Teachers (LET) Elementary Level human gisapublikar sa Professional Regulation Commission (PRC) ang resulta niadtong Huwebes, Disyembre 18, 2025.
Kini ang gisaysay ni De los Reyes atol sa eksklusibong pakighinabi niini sa Bombo Radyo Cebu News Team kun diin miisplikar pa kini nga dili niya mahangop ang panghitabo tungod kay wala siya nagbantay sa pagpawagas sa resulta kay nabusy siya sa iyang trabaho.
Apan sa dihang gipahibalo na kini siya sa iyang mga kauban ug kanhi college instructor, nakurat nalang kini sa kalampusang hangtod langit ang kalipay.
Ingon man nga gisaysay sab ni De los Reyes ang iyang kaagi sa pagtuon, pag-ampo, ug pagtuman sa mga tuo-tuo (superstition) aron ma-top 1 sa ilang batch dungan sa pangandoy nga ma-Summa Cum Laude sa pagradwar gikan sa Cebu Normal University (CNU).
Karon nga nakalampos na kini, plano ni De los Reyes nga mu-eskwela sa Graduate Studies sa hinaot nga makatudlo dili sa elementarya apan sa kolehiyo aron pagpasa sa kahanas sa umaabot nga mga nangandoy sab mahimong lisensyadong magtutudlo o di ba kaha sa laing opurtunidad sa gawas sa nasud.
Gani mipadayag pud kini siya sa iyang pasalamat sa natagamtam nga 100% tuition scholarship ug mga maayong mga instructor sa CNU nga nagpamatuod sa kaligdong sa reputasyon sa tunghaan isip hilabihang daghang mapasar nga estudyante sa mga licensure exams.
