Opisyal nang mobalik sa Pilipinas ang global pop phenomenon nga BTS para sa ilang pinaka-gipaabot nga “ARIRANG” World Tour nga ipahigayon sa Philippine Sports Stadium sa Bulacan sa Marso 13 ug 14, 2027.
Gipahibalo sa lokal nga promoter nga Live Nation Philippines ang kulbahinam nga comeback tour sa BTS, nga gilangkuban nila ni Jin, RM, j-hope, Jimin, Suga, V, ug Jung Kook, nga siguradong makapahilak ug makapalukso sa kalipay sa matag Filipino ARMY.
Mas kulbahinam pa ang konsyerto karong tuiga tungod kay ang grupo mopasundayag gamit ang 360-degree stage setup nga maghatag sa mga fans og mas immersive ug mas lapad nga viewing experience.
Ang pahibalo giubanan usab sa pagpagawas sa opisyal nga seat map, ug mga fan perks nga dugang nakapalipay sa mga ARMY nga dugay nang naghulat sa pagbalik sa grupo sa Pilipinas.
Ang mga tiket sa VIP Soundcheck nagkantidad og ₱25,000, ang Floor Standing nagkantidad og ₱20,000, ang Bleachers 1 nagkantidad og ₱13,500, ug ang Bleachers 2 nagkantidad og ₱7,500.
Ang mga benepisyo sa mga naghupot og tiket sa VIP Soundcheck naglakip sa access sa pre-show soundcheck party, VIP laminate ug lanyard, sayo nga pagsulod, sayo nga access sa mga merchandise, ug usa ka eksklusibong VIP gift.
Para sa presale, ang mga fans kinahanglan una nga magpalista sa ARMY Membership Global sa Weverse Shop. Ang rehistrasyon nagsugod niadtong Mayo 22 sa 1:00 PM ug molungtad hangtod Marso 27 sa 10:00 PM, ug ang ARMY Membership Presale gikatakda sa Hunyo 9 sa 11:00 AM, samtang ang Live Nation Presale sa Hunyo 10 sa 11:00 AM.
Samtang, ang pagbaligya sa kinatibuk-ang tiket magsugod sa Hunyo 11 sa 11:00 AM pinaagi sa Ticketmaster Philippines.
Gipagawas na usab ang mga giya para sa mga motan-aw sa konsyerto, diin ang standing section para lang sa mga nag-edad og 13 pataas, samtang ang seating sections abli para sa mga nag-edad og 8 pataas, basta ang mga menor de edad adunay kauban nga hamtong nga may tiket.
Dili usab tugutan ang mga mabdos ug kadtong adunay mga kondisyon medikal nga mosulod sa standing section para sa kaluwasan sa tanan.
Mahinumduman nga ang katapusang pagpasundayag sa BTS sa Pilipinas niadtong Mayo 2017 para sa “The Wings Tour” sa Mall of Asia Arena. Sa wala pa kini, nagpahigayon usab sila og mga konsyerto sa nasud niadtong 2016 ug unang nahimamat ang mga Pilipinong fans niadtong 2014 pinaagi sa “The Red Bullet” tour.
Niadtong Abril 2025, ang miyembro sa BTS nga si j-hope mibalik sa Manila para sa iyang solo concert nga “Hope On The Stage”.
Gipagawas sa BTS ang ilang “Arirang” album niadtong Marso 20 nga adunay total nga 14 ka tracks.
