Gi-postpone na usab sa Sandiganbayan Third Division ang arraignment o pagbasa sa akusasyon batok kang kanhi Senador Ramon “Bong” Revilla sa kasong malversation niadtong Lunes, Pebrero 9.
Kini samtang ang mga mosyon sa kampo sa kanhi Senador nga nagkuwestiyon sa kaso batok kaniya nga may kalabotan sa giingong P92.8 milyon nga ghost flood control project sa Pandi, Bulacan nagpadayon pa alang sa resolusyon.
Tungod niini, ang arraignment ni Revilla uban sa kanhi hepe sa finance section sa Department of Public Works and Highways Bulacan First District Engineering Office nga si Juanito Mendoza gi-postpone ngadto sa Pebrero 16 sa alas 8:30 sa buntag.
Kahinumduman nga ang ngalan sa kanhi Senador nalambigit sa iskandalo sa flood control projects human gibutyag ni kanhi DPWH USec. Roberto Bernardo nga ang kanhi Senador giingong nakadawat og kickbacks tungod sa pag-endorso sa mga proyekto sa flood control project.
