Nag-awhag si Most Rev. Archbishop Alberto “Abet” Uy sa mga Sugboanon nga paminawon ug tubagon ang tawag sa Sto. Niño, atol sa kapistahan sa Balaang Bata, Señor Sto. Niño de Cebu.
Nangulo si Arsobispo Uy sa turnover sa imahen sa Balaang Bata gikan sa Nuestra Señora Birhen dela Regla Shrine padulong sa M/V Lite Ferry 10 alang sa Fluvial Procession human sa Send-off Mass.
Sa eksklusibong pakighinabi sa Bombo Radyo Cebu News Team, gipahayag ni Arsobispo Uy ang iyang dakong kalipay sa iyang pinakaunang Sinulog isip Arsobispo sa Sugbo.
Gidayeg niya ang debosyon ug hugot nga pagtuo sa mga Sugboanon, nga bisan pa sa mga kalamidad ug trahedya, nagpabilin nga lig-on ug dili matandog.
Mensahe ni Arsobispo Uy, nga karong fiesta Señor, unta ang tanan magpabilin nga abli sa sangpit sa Sto. Niño ug saulogon ang kapistahan nga matinud-anon.
Dugang pa, nga libo-an ka mga deboto ug sakayang pandagat ang miapil sa Fluvial Parade sa Sugbo gahapong adlawa, nga nagpuno sa katubigan sa makabungog nga kolor ug kahayag.
Gibana-bana sa Philippine Coast Guard nga anaa sa 370 ka barko, lakip ang gagmay ug dagkong sakayan, ang misalmot sa maong proseso, nga usa ka tradisyonal ug makasaysayanong paghalad og debosyon kang Señor Sto. Niño de Cebu.
