Gipasiugda ni Cebu Archbishop Alberto S. Uy ang kahinungdanon sa pagpili og mga lider nga adunay maayong kalidad ug kapasidad sa pagserbisyo sa katawhan, imbes nga ang gidugayon sa ilang termino sa katungdanan.
Kini ang pahayag ni Archbishop Uy human maaprobahan sa Senado sa third and final reading ang usa ka bill nga nagtumong sa pagpalawig sa termino sa mga barangay ug Sangguniang Kabataan o SK officials ngadto sa lima ka tuig.
Matud sa arsobispo, mas importante ang kalidad sa usa ka lider kaysa sa gidugayon sa iyang paglingkod sa katungdanan.
Kana gumikan kay possibling, alang sa usa ka dili maayong lider, ang usa ka tuig taas na kaayo nga panahon, samtang alang sa usa ka maayong lider, ang lima ka tuig mahimong mubo ra kaayo.
Gipahayag ni Archbishop Uy ang maong panan-aw gahapon Martes, Setyembre 15, 2026, atol sa paglunsad sa “I Choose God Movement,” diin mitambong usab ang mga pari ug mga representante sa religious sector.
Ang kalihukan nagtumong sa pagporma sa konsensya sa mga Pilipino isip usa ka long-term initiative, ilabina sa ilang mga desisyon sa personal nga kinabuhi, pamilya, propesyon, sosyal nga relasyon ug civic responsibilities.
Sumala sa kalihukan, ang pagpili sa matarong ug responsableng mga desisyon dili lamang angay hatagan og pagtagad panahon sa eleksyon, kundili lakip sa adlaw-adlaw nga pagkinabuhi sa matag Pilipino.
