CEBU CITY- Nagpakitabang sa buhatan sa Waterfront Police Station 3, ang usa ka bana human niini makit-an ang iyahang asawa ug ang iyang hinigugma nga nag-check in sa Queensland Motel sa General Maxilom Ext. Brgy. Carreta Cebu City, sa nakalabay nga Nobyembre 6, 2024.
Basi sa kasayoran nga nakuha sa Bombo Newsteam gikan sa sinaligan nga tinubdan, nakadawat ug taho ang kapulisan sa Waterfront Police Station, gikan sa usa ka Manolito Culi Pada, pinaagi sa usa ka tawag sa telepono nga nagpahibalo nga ang iyahang asawa nakita niya nga misulod sa mabugnaw nga dapit kauban ang iyahang daw hinugugma.
Hinungdan, nga ang mga personahe sa maong estasyonan nga gilangkuban nila ni PStaff Sergeant Epifanio Comedido Jr, PSSg Fernando Cugal, PCorporal Darwin Flores ug Patrolman Relan Gella ubos sa direktang pagdumala ni PMajor JOHN LYNBERT CASTIGADOR YANGO miresponde sa mao nga dapit nga miresulta sa pagkasikop sa nahisgutang mga suspek mga alas 12:50 sa hapon sa sama nga adlaw.
Dugang pa, nga nasakpan sa akto o ‘caught in the act’ ang iyahang asawa nga si Melvic Laspiñas Pada, 44 -anyos sa ilahang silingan nga si Leopold Mañacap Tuquib, usa ka 62-anyos nga lalaki, kinsa ilaha ra nga silingan sa Cantonville San Isidro, Talisay City, Cebu.
Ang mga dinakpan posibli nga mag-atubang sa kaso nga paglapas sa Art. 333 sa RPC (Adultery), nga nahimo kung ang usa ka minyo nga babaye nakighilawas sa usa ka lalaki gawas sa iyang bana.
