CEBU CITY — Gikasubo ni Primitiva Lerio, ang asawa sa usa sa mga tripulante sa nisadsad nga barko sa kadagatan sa Brgy. Cantapoy, Malimono, Surigao del Norte nga nakit-ang wala nay kinabuhi.
Usa ang bana niini nga si Norman Galon, ang casualties sa nitagilid nga LCT Cebu Great Ocean.
Sa pakighinabi sa Bombo News Team, gibutyag ni Lerio nga nitawag pa kaniya ang iyang bana ug nagsulti nga nitaligid ang barko niini.
Dugang pa sa iyang bana nga “ayaw kabalaka kay adunay mo-rescue namo”.
Butang nga daku ang pagsalig ni Lerio nga anaa lang sa luwas nga kahimtang ang iyang bana.
Apan sa sunod nga adlaw, usa ka kaila niini ang niduol og nisulti nga usa ang iyang bana nga namatay sa insidente.
Butang nga gikumpirmar kini sa kumpanya nga gi-trabahoan ni Galon.
Saysay pa ni Lerio nga usa ka Electrician ang iyang bana diin duha palang kini ka buwan nga nagsakay sa maong barko.
Sa pagkakaron, gihatud na ang patay nga lawas ni Galon kaganinang kadlawn sa lungsod sa Consolacion kung asa sila kasamtangang nagpuyo.
Butang nga nipasalig ang tag-iya sa barko kang Lerio og burial ug financial assistance ilabi na nga adunay duha ka anak ang magtiayun.
Lumad nga taga-bohol si Galon samtang si Lerio kay taga-lungsod sa Dalaguete.
Sa siyam ka tuig nga panag-uban sa duha kay nagbunga kini og duha ka anghel, usa ka 9-anyos ug 3-anyos. (EKP/GBS)
