CEBU, PHILIPPINES- Nangulo si Department of Foreign Affairs (DFA) Secretary Ma. Theresa Lazaro sa ASEAN Foreign Ministers’ Meeting nga gipahigayon sa Cebu City karung adlawa Huwebes, Mayo 7, 2026, diin gipasiugda ang pagpalig-on sa kooperasyon ug panaghiusa sa rehiyon taliwala sa nagkadaghang hagit sa kalibutan.
Sa iyang opening statement, giingon ni Lazaro nga bisan pa sa tensyon sa Middle East ug epekto niini sa enerhiya, ekonomiya ug seguridad, magpabiling lig-on ang ASEAN sa pag-atubang sa mga hagit ug pagpadayon sa long-term goals ubos sa ASEAN Community Vision 2045.
Gibutyag usab sa kalihim nga dako na ang epekto sa krisis sa Middle East ngadto sa ASEAN region ilabina sa pagsaka sa presyo sa lana, enerhiya, pagkaon ug uban pang basic commodities.
Matud pa niini, naapektuhan usab ang transportasyon, turismo ug kahimtang sa milyon ka ASEAN nationals nga anaa sa Middle East.
Tungod niini, gideklarar sa Pilipinas niadtong Marso 24 ang state of national energy emergency isip tubag sa posibleng epekto sa energy security sa nasud.
Giingon usab ni Lazaro nga gipadayon sa ASEAN ang paningkamot sa pagpalig-on sa crisis coordination ug institutional readiness sa panahon sa internasyonal nga krisis ug emerhensya.
Lakip sa gihisgutan sa miting ang ASEAN external relations, Treaty of Amity and Cooperation nga nagsaulog sa golden jubilee karong tuiga, ug ang integration sa Timor-Leste ngadto sa ASEAN.
Samtang, gilauman usab nga maghatag og briefing ang Special Envoy of the ASEAN Chair on Myanmar kabahin sa kahimtang sa Myanmar ug implementasyon sa Five-Point Consensus.
