MOALBOAL, CEBU-Mapasigarbohon nga naghupot sa World Travel Awards winning trophy si Department of Tourism Secretary Christina Garcia-Frasco, atol sa pagbukas sa labing unang Philippine Tourism Dive Dialogue.
Kini human sa sunod-sunod nga ikalimang higayon, subli na usab nga nakab-ot sa nasud ang titulo sa Asia’s Leading Dive Destination sa 2023 World Travel Awards.
Ang maong pasidungog kay gipahinungod ni Secretary Frasco ngadto sa mga dive stakeholders sa nasud nga mitambong atol sa maong panagtigom gumikan kay produkto kini sa hini-usang paningkamot sa nagkadaiyang stakeholders nga naglangkob sa dive tourism industry sa nasud.
Nasayran nga nagpabilin sa pwesto ang Pilipinas tungod sa liboan niini ka mga scuba diving sites kauban sa nagkadaiyang flora ug fauna nga makita sama sa whale sharks, corals, sea snake ug uban pa, kung diin ang Pescador Island sa lungsod sa Moalboal mao ang labing inila nga diving site.
