Gitataw ni kanhi presidential spokesperson Atty. Harry Roque nga biktima siya sa political pressure uban sa pipila ka mga kaalyado sa kanhi Duterte administration, hinungdan nga aduna siyay katungod nga mangayo og asylum, partikular sa gobyerno sa Netherlands, diin siya kasamtangang nagpuyo ug nakig-uban sa mga overseas Filipinos.
Matod niya, wala na siya magdahom kang Presidente Ferdinand Marcos Jr. tungod sa kurakot niyang pamunoan sa nasod, hinungdan nga angayan lang nga itugyan ang gobyerno ngadto kang Bise Presidente Sara Duterte.
Dugang ni Roque, mobalik siya sa Pilipinas sa takdang panahon tungod kay mao ra kini ang iyang nasud, samtang gikatahong iproseso pa ang iyang asylum appeal.
Gihatagan og gibug-aton sa nasangpit nga abogado nga daghang higayon nga mahimo siyang mag-ilis sa iyang nasyonalidad apan mobalik gihapon sa Pilipinas.
Tataw pa ni Roque, gidugmok sa administrasyong Marcos ang mga Duterte ug ilang mga kaalyado hinungdan nga aduna siyay katungod nga mangayo og asylum.
Busa, nanawagan siya sa Presidente ug sa iyang mga kaalyado nga limpyohan ang ilang mga ngalan ug usbon ang kasaysayan, apan matud niya nga tulo na ka tuig ang milabay wala gihapon kini mahitabo, mao nga mas maayong itugyan na lang sa bise presidente ang gobyerno.|Bombo Irene Ardiente
