CEBU CITY-Nagtingkagol karong sa kustodiya sa Waterfront Police Station sa Cebu City Police si Atty. Collin Rosell human nanghawd og pagsulod sa Cebu City Hall og personal nga gideklarar ang iyang pag-asumir sa katungdanan isip City Administrator sa kagamhanang dakbayan sa Sugbo kagahapon adlawa sa Biyernes, Nobyembre 8, 2024.
Kini human sa tensyonadong panghitabo kagahapon sa buntag sa pagpamugos og sulod ni Rosell sa opisina niini sa City Hall kay nunot sa pagtuo sa ilang kampo nga si Dismissed Cebu City Mayor Michael Rama ang adunay katungdanan nga muingkod isip Mayor sa dakbayan sa napupos nga unom ka buwan nga suspension niini.
Pagkahuman sa nahitabong tensyonadong panghitabo, daling miluwat og pamahayag si Cebu City Mayor Raymond Alvin Garcia nga nipahimangno nga nagsunod lang kini sa mandato sa Department of Interior and Local Government (DILG).
Hinungdan nga nagpatapok si City Administrator Atty. Kristine Batucan sa mga department heads sa kagamhanan aron sa pagsiguro nga magpadayon ang serbisyo sa maong kagamhanang dakbayan.
Human sa maong panagtigom pasado alas 5 sa kahaponon, didto na sab milusad ang mga kapulisan sa dakbayan nga gipangulohan ni CCPO City Director PCol. Antonietto Cañete sa pagsikop ni Rosell tungod sa blotter report ug reklamo niini sa “Usurpation of Authority”.
Kalmado pang namalihug si PCol. Cañete apan nagpabiling naggumahi si Rosell og didto na ang eksenang mi-viral online.
Daling gidala sa istasyon sa Waterfront Police Station si Rosell og didto gibisita siya sa iyang kaalyado sa politika sama ni Vice Mayor Donaldo “Dondon” Hontiveros, Jerone Castillo, Cebu Gubernatorial Aspirant Pamela Baricuatro.
Sa eksklusibong pakighinabi sa Bombo Newsteam kang Rosell sa dihang anaa na kini sa Waterfront Police Station diin gitataw niini nga dili “usurpation of authority” iyang gibuhat kay siya nagatuo nga si Mayor Rama ang adunay tinuod nga katungdanan mulingkod isip mayor sa dakbayan.
