Gibarugan ni kanhi Presidential Legal Counsel Salvador Panelo nga politikanhon ang pagdakop kang kanhi Pres. Rodrigo Duterte.
Matod ni Atty. Panelo nga ang pagdakop kay walay laing katuyoan kon dili ang pagguba sa pamilyang Duterte tungod kay si Bise Presidente Sara Duterte ang labing lig-ong kandidato sa sunod nga presidential elections.
Gihatagan pa og gibug-aton sa kanhi tinudlo ni Duterte nga buhaton sa kasamtangang administrasyon ang tanan aron dili sila makadagan sa sunod nga piniliay.
Diin sa pipila ka mga okasyon, si VP Sara kaniadto nagpahibalo sa iyang posibleng pagdagan sa sunod nga presidential elections (2028).
Hinuon, pending pa ang impeachment complaint batok sa bise presidente ug gipaabot nga masugdan na ang trial proper sa sunod nga Kongreso.
Ug kon gani permanente na siyang matangtang sa iyang katungdanan isip bise presidente, dili na siya makahupot og laing posisyon sa gobyerno.
Ingon man nga una niini kay gibarugan usab sa administrasyong Marcos sa sinugdan nga ang pagtabang aron sa kataposang pagdakop sa presidente mao lamang ang pagtuman sa katungdanan sa gobyerno isip sakop sa International Criminal Police Organization.
