Gihangyo ni Atty. Israelito Torreon ang Department of Justice (DOJ) nga ibasura ang kasong obstruction of justice nga gisang-at batok kaniya sa Philippine National Police-Criminal Investigation and Detection Group (PNP-CIDG).
Ang reklamo may kalabotan sa pagsulay sa pag-aresto niadtong 2024 kang Pastor Apollo Quiboloy, ang nagpailang anak sa Ginno ug lider sa Kingdom of Jesus Christ (KOJC).
Sa iyang counter-affidavit nga gisang-at niadtong Biyernes, Enero 23, si Torreon miingon nga naglihok lamang kini subay sa iyang mga katungdanan isip abogado atol sa operasyon sa pulisya niadtong Agosto 24, 2024 sa KOJC compound sa Buhangin, Davao City.
Miingon kini nga ang iyang aksyon mao ang pagpanalipod sa iyang kliyente ug pagsiguro sa kaluwasan sa publiko sulod sa compound.
Giingon usab niini nga ang timing sa reklamo kay usa ka isyu. Sumala sa abogado, kini gisang-at lamang human mabasura ang mga nangaging kaso batok kaniya.
Kahinumduman nga ang PNP-CIDG nagsang-at sa reklamo niadtong Disyembre 2025, nga nag-akusar kang Torreon sa paglapas sa Presidential Decree No. 1829, nga nagtumong sa pagbabag sa pagdakop ug pagpasaka og kaso sa mga kriminal nga nakasala, may kalabotan sa iyang mga aksyon atol sa pagsulay sa pag-aresto kang Quiboloy.
Kasamtangang gibilanggo si Quiboloy sa Pasig City Jail, ug nag-atubang og managlahing mga kaso sa giingong human trafficking ug child abuse.
