Nag-negatibo sa drug test ug alcohol ang driver sa sports utility vehicle (SUV) nga nidaro sa entrance sa Ninoy Aquino International Airport (NAIA) Terminal 1 nga miresulta sa kamatayon sa duha ka tawo.
Mao kini ang gikompirmar sa Aviation Police.
Matod ni Col. Cesar Lumiwes, ang hepe sa Aviation Security Unit sa National Capital Region, nga ang 47-anyos nga driver kay dili ubos sa impluwensya sa bisan unsang substance sa dihang nahitabo ang aksidente.
Gipasabot ni Lumiwes nga sayo sa buntag nagpanaog ang drayber sa iyang amo sa wala pa mahitabo ang trahedya.
Gitataw usab sa opisyal nga ang human error kay mahimong mahitabo ni bisan kinsa, ilabi na kung dili maayo ang kahimtang sa drayber tungod sa personal nga problema, stress, o pressure.
Matod ni Lumiwes nga malikayan unta ang insidente kon mas lig-on pa ang bollard sa entrada sa maong dapit.
Ingon man nga nimando na si Presidente Ferdinand Marcos Jr. sa pag-imbestigar sa kalidad ug kaepektibo sa mga bollards human sa insidente.
Samtang nagpadayon ang kaso batok sa driver sa SUV nga adunay professional driver’s license ug nasayran usab nga aduna kini record nga nagtrabaho isip overseas driver.
Gipasakaan na og duha ka ihap sa reckless imprudence resulting in homicide, multiple physical injuries, ug damage to property ang maong drayber.
