CEBU CITY-90 porsyento na matud pa ang paghatag og ayuda sa city government sa tanang barangay sa dakbayan sa Sugbo taliwa sa gipatuman sa Enhanced Community Quarantine (ECQ) gumikan sa COVID-19.
Kini ang gibutyag ni Majority Leader Cebu City Councilor Raymund Garcia sa dihang nahinabi sa Bombo Radyo Cebu atol sa tulumanong Bombo Barangayan.
Nagkanayon ang konsehal nga ang pundo gikan sa city government nga gipalit og bugas ug canned good ang hingpit na nga nahatag sa mga barangay ug gani lauman nga mahimong siento porsyento na ang pagpanghatag niini karong semanaha.
Subay niini, niadtong Abril 11 nahatag na usab sa city gov. sa 77 ka barangay ang financial subsidy kung diin ang mga dagko nga barangay ang makadawat og P3-M,ang dili kaayo dako makadawat og P2-M ug ang gamay lamang nga mga barangay ang makadawat og P1-M.
80 porsyento matud pa niini ang ipalit usab og mga nag-unang panginahanglanon nga mga pagkaon og ang 20% ang alang sa mga medical equipment.
Apan gitino ni Garcia nga ang barangay na ang mag-igo kung unsaon nila kining maong ayuda para sa ilang ginsakupan.
